Chés mariaches polonais.

 Chés mariaches polonais.

Chétot quand même quetcosse chés mariaches polonais !
Ej pale ed cheux qu'in veillot y a ein' paire d'années;
Falot les intinde avec leus bandonéons,
ln l'z arpérot d'lon, au bout d'chés corons.

Chés gosses, à leu rinconte, tertous i'z accourotent,
Jusqu'à l'intrée d'l'église, ech cortèche i'l'suivotent.
« Vie, vie, vie, vie mariache » i criot't sans arrêt,
Pour que chés invités i leu jett't dé l'monnaie.

A forche, chés gosses pouvot't parler in polonais,
Tout s'qui pouvot s'crier, ils savot't, même chés « français ».
Falot vire chés batalles qu'y avot dins chés gulots
Pour ramasser chés pièches, même si y in avot dins l'iau.

Tous chés gins, dins l'rue, i s'métot't d'vant leu porgé
Pour vire passer chés mariés et leu joie partager,
Tout cha s'passot dins ein boucan abominape,
Fait d'cris, d'musiqu', d'pétards, cha n'étot qu'admirape.

J'étos tchiot mais jé n'pouvos pont ell'armarquer,
Chés ropes ed chés files arsonnot't à ein bouquet,
y-in avot des jaunes, des bleues, ed tous les couleurs
Chétot comme des fleurs qui marchot't vers el bonheur.

Chés hommes avot't des costumes faits sur mesure,
I marchot't bien drot, sauf cheux qui avot't ein' biture
Et cha, ch'est marrant. pace qu'y in avot toudis ein
Dins tous chés mariaches, qui fesot el bout-en-train.

Asteur, i s'mettent in ménache, in s'marie même pu,
Comme cha, à l'moinde dispute, ech contrat i est rompu;
Chés gosses i n'peutent même pont crier « Vie mariache »,
Chés mariés i sont in jeans, et ch'est bien domache.

Quéquefos, à l'radio, j'rintind chel gaie musique,
Que chés jones d'asteur in'trouvent pont accadémique ;
Si i savot't chés imaches qu'in vot défiler,
1vérot't chés souvenirs qu'in a accumulés!